Boni imperatoris est probatam in acie militis animare virtutem, ut fortitudo laudis pabulis invitata in secundis congressibus dediscat lucis affectum. cuius robur ducis praeconio non nutritur? quibus se denegent etiam minus valida tironis membra conflictibus, quando rectoris testimonio videt sibi non perire quod gesserit? sola via est, qua ad proeliandum crescat intentio, quotiens bene gesta non delet oblivio. utinam devotionem vestris mota precibus diablicum certamen interimat! utinam devotionem meam in pace manifestet, ut cuius studium resignavit adversitas, illius concordia commendet obsequium! ad Marcellianum episcopum directa est a fratre vestro instructa legatio; sed quid promoverit ipse rescripsit. Quod restat, porrectis salutationis precor officiis, ut quidquid aegrum est medica oratione curetis et inter latentium secreta morborum, qui in generalem necem servatur, ferro spiritali resecetis errorem. vale.